A nosa canle ética é un mecanismo fundamental para fomentar a transparencia e actuar ante calquera tipo de conduta irregular, ante as que mantemos unha política de tolerancia cero. Nesta canle, por suposto, garantimos a confidencialidade e protexemos a identidade das persoas que queren denunciar algún suceso ou algunha actitude inapropiada, algo prioritario para velar polo cumprimento tanto das leis coma do noso código de valores corporativo.

A xestión dos riscos é un elemento fundamental para mellorar o noso día a día e anticiparnos ao mañá. Traballamos de forma continua para reforzar este ámbito: actualizamos permanentemente o mapa de riscos corporativos e mantemos unha comunicación fluída cos nosos grupos de interese para integrar nel a súa perspectiva. Estamos en proceso de mellora do noso modelo de xestión, tomando como referencia o marco metodolóxico COSO ERM e ISO 31000, que promove unha visión integrada na estratexia e aliñada cos nosos principios e o noso propósito empresarial.

O diálogo cos nosos grupos de interese e a escoita activa son unha panca fundamental para xerar un impacto positivo na nosa contorna e dar resposta ás súas expectativas cunha actitude proactiva e innovadora. O noso Estudo de Materialidade, que actualizamos de forma continua, é clave para adaptarnos ás novas tendencias e aos novos requirimentos: con el identificamos os temas máis relevantes, priorizámolos e integrámolos na nosa estratexia.

Aproximadamente o 80 % do comercio global pasa polas cadeas de subministración, o que as converte tanto nun motor económico como nunha ferramenta fundamental para xerar impacto positivo. En Hijos de Rivera temos unha Política de Compras e unha Avaliación de Riscos da Cadea de Valor para escoitar e analizar o desempeño dos provedores (99 % europeos e, deles, un 82 % nacionais), detectar áreas de mellora e acompañalos no seu camiño de sostibilidade en materias como igualdade, redución de consumo de auga ou minimización de residuos.